तुळजाभवानी मंदिरातून एक मोठी बातमी समोर आली आहे. मंदिर परिसरात तंबाखूजन्य पदार्थ खाऊन सार्वजनिक ठिकाणी थुंकणाऱ्या ८ पुजाऱ्यांवर प्रशासनाने कठोर पाऊल उचललं आहे. या सर्व पुजाऱ्यांवर मंदिर प्रवेशबंदीची कारवाई करण्यात आली आहे.मागील महिन्यात मंदिर प्रशासनाने काही पुजाऱ्यांना यासंदर्भात इशारा देत नोटीस बजावली होती. त्यानंतर सहा पुजाऱ्यांनी आपल्या चुकीची कबुली देत माफीनामा सादर केला. या सहा पुजाऱ्यांना एक महिन्याची मंदिर प्रवेशबंदीची शिक्षा देण्यात आली आहे.

मात्र, उर्वरित दोन पुजाऱ्यांनी न खुलासा दिला, ना माफीनामा. त्यामुळे त्यांच्यावर अधिक कठोर कारवाई करत तब्बल तीन महिन्यांची मंदिर प्रवेशबंदी लागू करण्यात आली आहे. या कारवाईमुळे मंदिर परिसरातील पुजाऱ्यांमध्ये खळबळ उडाली असून, भविष्यात अशा प्रकारच्या गैरवर्तणुकीवर नियंत्रण ठेवण्यासाठी ही कारवाई इशाराच ठरत आहे. तुळजाभवानी मंदिराच्या पवित्र जपण्यासाठी प्रशासनाचे हे पाऊल महत्त्वाचे ठरत आहे.