सोशल मीडियावर टिकटॉक पुन्हा भारतात सुरू होणार असल्याच्या चर्चेला चांगलंच उधाण आलं आहे. भारत-चीन संबंध सुधारत असल्याने अशा चर्चा रंग घेत आहेत. पंतप्रधान नरेंद्र मोदी 29 ऑगस्ट ते 2 सप्टेंबर या कालावधीत जपान आणि चीन या दौऱ्यावर जाणार आहेत. त्यामुळे भारत आणि चीनमधील संबंध सुधारत असल्याचं चित्र समोर आलं आहे. याच पार्श्वभूमीवर 2020 मध्ये सुरक्षा कारणांमुळे भारतात बंदी घालण्यात आलेल्या चीनी अॅप्सना परत सुरू करण्याचा विचार होत असल्याची चर्चा आहे. तथापि, केंद्र सरकारने या वृत्ताचं खंडन केलं आहे. सरकारच्या सूत्रांच्या म्हणण्यानुसार, सध्या तरी टिकटॉकसह इतर चीनी अॅप्सवरील बंदी हटवण्याचा कोणताही निर्णय घेतलेला नाही. दरम्यान, टिकटॉक भारतात पुन्हा सुरू होणार का, याबाबतची चर्चा सोशल मीडियावर मात्र थंडावण्याचं नाव घेत नाहीये.