जम्मू-काश्मिरातील पहलगाममध्ये दहशतवाद्यांनी पर्यटकांवर हल्ला केला. या हल्ल्यात २६ पर्यटकांनी जीव गमावला. तर अनेक जण जखमी झाले. पर्यटकांना वाचवण्यासाठी एका स्थानिक घोडेवाल्यानं जीवाची बाजी लावली. दहशतवाद्यांशी तो एकटा भिडला. त्यांच्या हातून रायफल हिसकावण्याचा प्रयत्न केला. पण निर्दयी दहशतवाद्यांनी त्याचाही जीव घेतला. दहशतवादी गोळीबार करताना अनेक स्थानिक तरुणांनी धाडस दाखवून पर्यटकांना वाचवल्याचे व्हिडिओ सोशल मीडियावर व्हायरल होत आहेत. दहशतवाद्यांच्या गोळीबारात जखमी झालेल्या एका पर्यटकाला पाठीवर उचलून सुरक्षितस्थळी घेऊन जातानाचा एका स्थानिक तरुणाचा व्हिडिओ व्हायरल होत आहे.

तसाच आणखी एका काश्मिरी मुलाच्या धाडसाचा व्हिडिओ देखील व्हायरल होत आहे. पर्यटकाच्या लहान बाळाला एक काश्मिरी मुलगा कडेवर उचलून सुरक्षित ठिकाणी घेऊन जाताना व्हिडिओत दिसत आहे. हा व्हिडिओ साम टीव्हीच्या हाती लागला आहे. स्थानिक मुलानं दाखवलेल्या धाडसाचं सर्वत्र कौतुक होत आहे. दहशतवादी गोळीबार करत असताना काश्मिरी मुलानं पर्यटकाच्या हातातलं बाळ आपल्या जवळ घेतलं आणि त्याला सुरक्षित ठिकाणी नेत जीव वाचवला.