सचिन कदम, खोपोली | साम टीव्ही

भररस्त्यात सुस्साट धावणारी रिक्षा बघा. मागच्या सीटवर तीन ते चार शाळकरी मुली बसल्या आहेत. तर ड्रायव्हरच्या बाजूला एक व्यक्ती बसली आहे. धक्कादायक म्हणजे रिक्षाचं हँडल शाळकरी मुलीकडं दिलं आहे आणि ही मुलगी वाऱ्याच्या वेगानं रिक्षा चालवतेय. बाजूला बसलेला ड्रायव्हर या 'ऑटोचालक' मुलीला इन्स्ट्रक्शन्स देताना ऐकायला मिळत आहे. हा व्हिडिओ सध्या सोशल मीडियावर व्हायरल होत आहे. मिळालेल्या माहितीनुसार, हा व्हिडिओ रायगड जिल्ह्यातील खोपोली परिसरातील आहे.

शाळकरी मुलगी रिक्षा चालवत असून, पाठीमागच्या सीटवर इतर मुली बसल्या आहेत. धक्कादायक म्हणजे रिक्षा चालवणाऱ्या मुलीच्या बाजूला ड्रायव्हर बसला आहे. तो त्या मुलीला काही सूचना देत आहे. शाळकरी मुलींची वाहनांमधून धोकादायक पद्धतीने वाहतूक करतानाच्या अनेक घटना उघड झाल्या आहेत. काही व्हिडिओ पण व्हायरल झाले आहेत. त्यावर सरकारनं बंधनंही आणली आहेत. काही ठिकाणी तर कठोर कारवाई देखील केली आहे. तर अनेक कठोर नियम केले आहेत. पण तरीही अशा प्रकारच्या अवैध वाहतुकीला पूर्णपणे आळा बसलेला नाही. त्यात हा खोपोलीचा व्हिडिओही व्हायरल झाला आहे. पोलीस प्रशासन आणि आरटीओ या प्रकाराची दखल गांभीर्यानं घेणार का? हे पाहणं महत्वाचं ठरणार आहे.