पुणे जिल्ह्यातल्या शिवनेरी किल्ल्यावर सलग दुसऱ्या दिवशी मधमाश्यांनी शिवभक्तांवर हल्ला केला आहे. शिवजन्मोत्सव साजरा करण्यासाठी मोठ्यासंख्येने शिवभक्त शिवनेरी किल्ल्यावर दाखल झाले. अशामध्ये आज पुन्हा मधमाश्यांनी त्यांच्यावर हल्ला केला. मधमाश्यांच्या हल्ल्यामध्ये अनेक शिवभक्त जखमी झाले आहेत. मधमाश्यांच्या हल्ल्यामुळे शिवनेरी किल्ला ३ तासांसाठी बंद ठेवण्यात आला आहे.

मधमाश्यांच्या हल्ल्यामुळे वन विभागाकडून शिवभक्तांना सतर्क रहाण्याच्या सूचना देण्यात आल्या आहेत. खबरदारी म्हणून शिवनेरी किल्ल्यावर येण्यास ३ तास बंदी घालण्यात आली आहे. रविवारी देखील शिवनेरी किल्ल्यावर मधमाश्यांनी शिवभक्तांवर हल्ला केला होता. या हल्ल्यामध्ये ४० ते ५० शिवभक्त जखमी झाले होते.

पोलिस अधिकाऱ्याने दिलेल्या माहितीनुसार, 'मंत्री महोद्य आल्यानंतर शिवनेरी किल्ल्यावर शिवजन्मोत्सवाचा कार्यक्रम सुरू होता. त्याचवेळी अचानक मधमाश्यांनी शिवभक्तांवर हल्ला केला. मला देखील सात ते आठ मधमाश्या चावल्या. डॉक्टरांची टीम गडावर उपस्थित आहे त्यांनी तात्काळ जखमींवर उपचार केले. मधमाशा शांत होत नाही तोपर्यंत शिवभक्तांनी गडावर येणं टाळावं यासाठी ३ तासांसाठी गडावर प्रवेश बंद करण्यात आला आहे.'