तुझा संतोष देशमुख करू, अशी धमकी देणाऱ्या फरार कृष्णा आंधळेच्या दोन्ही मित्रांना बीड पोलिसांनी कर्नाटकातून अखेर अटक केली आहे. वैजनाथ बांगर आणि अभिषेक सानप अशी या दोघांची नावं आहेत.

सरपंच संतोष देशमुख हत्ये संदर्भात बातम्या बघत असलेल्या एका तरुणाला धारूरमध्ये वैजनाथ बांगर आणि अभिषेक सानप यांनी अमानुष मारहाण केली. तसंच तुझा संतोष देशमुख करू अशी धमकी देखील दिली होती. या घटनेत अशोक मोहिते हा गंभीर जखमी झाला आहे. या तरुणावर लातूरच्या खासगी रुग्णालयात उपचार सुरू आहेत. चौकशी दरम्यान हे दोघे संतोष देशमुख हत्या प्रकरणातील फरार आरोपी कृष्णा आंधळे याचे मित्र असल्याचं समोर आलं. त्यानंतर धारूर पोलिसांचं पथक या दोघांना शोधण्यासाठी रवाना करण्यात आलेलं होतं. त्यानंतर कर्नाटकातून त्यांच्या मुसक्या अवळण्यात आलेल्या आहेत. आता त्यांच्याकडून कृष्णा आंधळेचा ठाव ठिकाणा कळणार का? याकडे सगळ्यांचं लक्ष लागलं आहे.