शेतकरी नेते राजू शेट्टी यांना सांगली पोलिसांनी ताब्यात घेतलं. रत्नागिरी - नागपूर महामार्ग आणि शक्तीपीठ महामार्गामधील बाधित शेतकऱ्यांसाठी राजू शेट्टी यांचे आज आंदोलन होणार होते. या आंदोलनापूर्वीच पोलिसांनी त्यांना ताब्यात घेतलं. सांगलीमध्ये स्वाभिमानी शेतकरी संघटनेच्या कार्यकर्त्यांची देखील पोलिसांकडून धरपकड सुरू आहे.

शक्तीपीठ महामार्गाला विरोध म्हणून राजू शेट्टी यांनी आज आंदोलनाचा इशारा दिला होता. राजू शेट्टी यांनी आज रास्ता रोको आंदोलनाची हाक दिली होती. या आंदोलनाला मोठ्यासंख्येने शेतकरी सहभागी होणार होते. या आंदोलनापूर्वीच राजू शेट्टी यांना त्यांच्या शिरोळ येथील निवासस्थातून पोलिसांनी ताब्यात घेतलं.

राजू शेट्टी यांच्यासोबत स्वाभिमानी शेतकरी संघटनेच्या प्रमुख कार्यकर्त्यांना देखील पोलिसांनी ताब्यात घेतलं आहे. स्वाभिमानी शेतकरी संघटनेच्या कार्यकर्त्यांची पोलिसांकडून सध्या धरपकड सुरू आहे. शक्तीपीठ महामार्ग रद्द करावा यासाठी स्वाभिमानी शेतकरी संधटनेकडून मागणी केली जात आहे. या मागण्यासाठी स्वाभिमानी शेतकरी संघटना राज्यभर आंदोलन करत आहे.