पुणे शहरात मुसळधार पावसाने जोरदार हजेरी लावली असून शहराच्या अनेक भागांमध्ये पाणी साचण्याची स्थिती निर्माण झाली आहे. सततच्या पावसामुळे खडकवासला धरणातील जलसाठा झपाट्याने वाढत आहे. त्यामुळे धरण प्रशासनाने मुळा-मुठा नदीमध्ये २ हजार क्युसेक वेगाने पाण्याचा विसर्ग करण्याचा निर्णय घेतला आहे.

या पाण्यामुळे नदीकाठच्या भागांमध्ये पूर परिस्थिती उद्भवण्याची शक्यता आहे. नागरिकांनी सतर्क राहावे आणि नदीकाठी जाणे टाळावे, असे आवाहन प्रशासनाकडून करण्यात आले आहे. दरम्यान, जोरदार पावसामुळे इथल्या भिडे पुलावरही पाणी साचल्याचे दिसून आले आहे. त्यामुळे त्या परिसरातील वाहतूकीवर परिणाम झाला असून, नागरिकांची मोठी गैरसोय होत आहे. हवामान विभागाने पुढील काही तास जोरदार पावसाचा इशारा दिल्याने प्रशासन आणि आपत्कालीन यंत्रणा सतर्क ठेवण्यात आल्या आहेत.