बैलगाडा शर्यतीच्या घाटात घोडेस्वाराचा थरकाप उडवणारा अपघात झाला. वाऱ्याच्या वेगाने धावणारा घोडेस्वार थेट धावत्या बैलगाड्याखाली आला अन देव तारी त्याला कोण मारी! ही म्हण सत्यात उतरली. पुणे जिल्ह्यातील आंबेगाव तालुक्यात विठ्ठलवाडी येथे बैलगाडा शर्यतीत बैलगाडा घाटात धावत असताना घोडीवर स्वार झालेला अनिकेत चिखले हा युवक अचानक तोल जाऊन थेट घाटात कोसळला.

यावेळी वाऱ्याच्या वेगाने धावणाऱ्या बैलगाड्याखाली अनिकेत आला. क्षणभर सर्वांना वाटले की, आता अनिकेत भरधाव वेगात येणाऱ्या बैलगाड्याखाली सापडणार मात्र पुढे जे घडलं ते चकित करणारं होतं. घाटात पडलेल्या अनिकेतला पाहताच भरधाव धावणाऱ्या बैलांच्या दोन्ही जोड्यांनी आणि गाडीनेही थेट उडी मारत त्याला स्पर्शही होऊ न देता पुढे धाव घेतली आणि मोठा अनर्थ टळला.