पहलगाम येथे झालेल्या हल्ल्यानंतर भारत-पाकिस्तान सीमेवर तणाव वाढलेला असतानाच पाकिस्तानने अमेरिकेचे राष्ट्रपती डोनाल्ड ट्रम्प यांच्यासमोर गाऱ्हाणं गायलं आहे. अमेरिकेत कार्यरत पाकिस्तानचे राजदूत रिजवान सईद शेख यांनी राष्ट्रपती ट्रम्प यांना विनंती केली आहे की, त्यांनी काश्मीरमध्ये झालेल्या हल्ल्याच्या पार्श्वभूमीवर भारतासोबत वाढणारा तणाव कमी करण्यासाठी मदत करावी. त्यांनी स्पष्ट केलं की पाकिस्तान मोठ्या देशाशी म्हणजेच भारताशी युद्ध करू इच्छित नाही.

एका वृत्तवाहिनीला दिलेल्या मुलाखतीत शेख म्हणाले, आमच्याकडे एक असे राष्ट्रपती आहेत, जे आपल्या कार्यकाळात जागतिक शांततेसाठी एक स्पष्ट उद्दिष्ट घेऊन उभे राहिले आहेत. शांतिदूत म्हणून एक वारसा निर्माण करण्याची त्यांची भूमिका आहे. एक असा नेता, ज्याने युद्धांना समाप्त केलं, युद्धांचा विरोध केला आणि वाद मिटवण्यासाठी भूमिका घेतली. मला वाटतं काश्मीरसारखा आण्विकदृष्ट्या अधिक संवेदनशील आणि महत्त्वाचा ठिकाण दुसरा नाही.