शवागृहात मृतदेह गुंडाळण्यासाठी लागणाऱ्या कापडासाठी तब्बल 2 हजार रुपयांची लाच घेतल्याचा धक्कादायक प्रकार समोर आला आहे. नवी मुंबईतल्या वाशी रुग्णालयात ही माणुसकीला काळिमा फासणारी घटना घडली असून एका 23 वर्षीय तरुणीनं आत्महत्या केली होती. ही मुलगी मूळची कानपूरमधली होती. ती नवी मुंबईतल्या ऐरोली परिसरात पेइंग गेस्ट म्हणून राहत होती. रविवारी पहाटे तिने राहत्या खोलीत गळफास घेऊन आत्महत्या केली. मृत्यूची माहिती मिळाल्यानंतर तिचे आई-वडील उत्तर प्रदेशहून तत्काळ नवी मुंबईत दाखल झाले. मृतदेह ताब्यात घेण्यासाठी ते वाशी रुग्णालयात गेले असता, शवागृहातील कर्मचाऱ्यांनी त्यांच्याकडे पैशांची मागणी केली.