'अजितदादांनीच मला घड्याळ चिन्हावर विधानसभा निवडणूक लढायला सांगितलं होतं', असं मोठं विधान नवाब मलिक यांनी केलं आहे. त्याचबरोबर पक्ष ही कोणाचीही प्रॉपर्टी नसते, पक्ष आणि चिन्हाबाबत कोर्टानेच अजित पवार यांच्या बाजूने निर्णय दिला आहे, असं देखील मलिक यांनी म्हंटलं आहे.

मानखुर्द-शिवाजीनगरमधून नवाब मलिक हे अजित पवार यांच्या राष्ट्रवादीकडून विधानसभा निवडणूक लढवण्यास इच्छुक होते. मात्र या ठिकाणी महायुतीने शिंदे सेनेचा उमेदवार दिल्याने नवाब मलिक यांचा पत्ता कट झाला. त्यानंतर नवाब मलिक यांनी अपक्ष उमेदवारी अर्ज दाखल केला असला तरी त्यांचा पाठिंबा अजित पवार यांनाच असणार आहे. आज नवाब मलिक यांनी आपल्या प्रचाराला सुरुवात केली आहे. त्यापूर्वी त्यांनी माध्यमांशी संवाद साधला. यावेळी बोलताना ते म्हणाले की, ' मी आजपासून प्रचाराला सुरुवात करतो आहे. मला पक्षाकडून विचारणा झाली होती पण मी कोणालाही येऊ नका, असं सांगितल. मला देखील इतर ठिकाणी बोलवलं आहे पण मी माझ्या मतदारसंघातच प्रचार करणार आहे. अजित पवारांनी स्वत: मला घड्याळ चिन्हावर निवडणूक लढवण्यास सांगितले होते', असं त्यांनी म्हंटलं आहे. तर पक्ष कोणाचीही प्रोपर्टी नसते. सध्या प्रकरण कोर्टात असून अजित पवारांच्या बाजून निर्णय दिला असल्याची प्रतिक्रिया देखील नवाब मलिकांनी दिली.

Edited By Rakhi Rajput