मयूर राणे, साम टीव्ही

मुंबई: हार्बर मार्गावर पुन्हा एकदा धक्कादायक प्रकार घडला. आज मानखुर्द रेल्वे स्टेशनजवळ लोकलमधून एक प्रवासी खाली पडल्याची घटना घडली. सुदैवानं त्या प्रवाशाचा जीव थोडक्यात वाचला. अपघातानंतर काही क्षणांतच त्याच मार्गावरून दुसरी लोकल ट्रेन धावून आली होती. त्यामुळे काही वेळासाठी प्रवाशांमध्ये भीतीचं वातावरण निर्माण झालं होतं. मात्र, लोकल सुरक्षित अंतरावरच थांबली आणि एक मोठा अनर्थ टळला. या घटनेमुळे पनवेलकडे जाणारी वाहतूक काही वेळासाठी विस्कळीत झाली होती. रेल्वे प्रशासनाकडून लगेचच परिस्थिती नियंत्रणात आणण्यात आली आणि वाहतूक पूर्ववत करण्यात आली. मुंबई लोकलमध्ये अपघातांची मालिका सुरूच असून, प्रवाशांच्या सुरक्षिततेबाबत पुन्हा एकदा प्रश्नचिन्ह उपस्थित झालं आहे.