मुंबईकर गणेश भक्तांच्या परतीच्या प्रवासामुळे रायगड जिल्ह्यातील लोणेरे, माणगाव आणि इंदापुर परिसरात मोठ्या प्रमाणावर वाहतूक कोंडीची समस्या निर्माण झाली आहे. मुंबई-गोवा महामार्गावर वाहनांची संख्या वाढल्याने मुंबई लेनवर लांबच लांब रांगा लागल्या आहेत. मुंबई-गोवा महामार्ग चौपदरीकरणाचे काम अंतिम टप्प्यात आले असले तरी इंदापुर, माणगाव आणि लोणेरे येथे बॉटलनेक सारखी परिस्थिती झाल्याने गणेश भक्तांना प्रवासात प्रचंड अडचणींना सामोरे जावे लागत आहे. वाहतूक सुरळीत करण्यासाठी पोलिस प्रशासन सतत प्रयत्न करत असूनही वाहनांची प्रचंड गर्दी आणि काम सुरू असलेले रस्ते यामुळे पोलिसांची दमछाक होत आहे.