मुंबईतील वडाळा पूर्वेकडील गणेश नगर सिग्नल परिसरात रात्री भीषण अपघात घडला. ट्रकखाली चिरडून एका महिलेचा मृत्यू झाल्याने परिसरात हळहळ व्यक्त केली जात आहे. या घटनेनंतर स्थानिक नागरिकांमध्ये संतापाचे वातावरण निर्माण झाले आहे. बीपीटीचा रस्ता बंद असल्यामुळे या मार्गावरून मोठ्या प्रमाणात वाहतूक वळवण्यात येत असल्याचा आरोप स्थानिक नागरिकांनी केला आहे. परिणामी, परिसरात वाहतुकीचा ताण वाढला असून अपघातांच्या घटनांमध्येही वाढ होत असल्याची तक्रार नागरिकांनी केली.

महिलेच्या मृत्यूच्या घटनेनंतर संतप्त नागरिकांनी रस्त्यावर उतरून वाहतूक रोखली. यावेळी नागरिकांनी प्रशासनाच्या कारभाराविरोधात नाराजी व्यक्त करत परिसरातील वाहतूक सुरक्षित करण्याची मागणी केली. तसेच, वारंवार होणारे अपघात रोखण्यासाठी तातडीने ठोस उपाययोजना करण्याची मागणी करण्यात आली. प्रशासनाने या समस्येकडे गांभीर्याने लक्ष देऊन आवश्यक सुरक्षा उपाययोजना कराव्यात, अन्यथा तीव्र आंदोलन छेडण्यात येईल, असा इशारा स्थानिक नागरिकांनी दिला आहे.