अमर घटारे, दर्यापूर | साम टीव्ही

अमरावतीत जिल्हाधिकारी यांच्या आदेशानुसार व्यावसायिक ठिकाणी घरगुती गॅस सिलेंडरचा वापर होत असल्याच्या तक्रारीवरून महसूल विभागाने धडक कारवाई मोहीम सुरू केली आहे. दर्यापूर शहरात विविध व्यावसायिकांकडून घरगुती गॅस सिलिंडर जप्त करण्यात आले. दर्यापूरमधील अंजनगाव टी-पॉईंट परिसरातील काही हॉटेलमधून महसूल विभागाने घरगुती गॅस सिलिंडर जप्त केले. ही कारवाई सुरू असताना परिसरात मोठ्या प्रमाणात लोक जमा झाले.

जमावाने अधिकाऱ्यांना धक्काबुक्की केली. पंचनामे फाडल्याचीही माहिती मिळाली. धक्कादायक म्हणजे जप्त केलेले काही सिलिंडर सरकारी वाहनातून काढून काही जण ते घेऊन निघून गेले. या प्रकारामुळे परिसरात काही काळ तणावाचे वातावरण होते. घटनेची माहिती मिळताच दर्यापूर पोलीस घटनास्थळी पोहोचले. तासाभरानंतरही सिलिंडर घेऊन गेलेल्या व्यक्तींपैकी कोणीही हजर झाले नसल्याची माहिती मिळाली. नायब तहसीलदार प्रमोद काळे यांच्या मार्गदर्शनाखाली दर्यापूर पोलीस ठाण्यात तक्रार दाखल करण्याची प्रक्रिया सुरू केली.