मुंबई: येथील कर्नाक पूल अजूनही सुरू न झाल्याने आज ठाकरे गट आणि मनसेने तीव्र आंदोलन केले. कर्नाक पूल सुरू करण्याच्या मागणीसाठी दोन्ही पक्षांनी एकत्रित आंदोलन सुरू केले आहे. याआधीही मराठीच्या मुद्यावर मनसे आणि ठाकरे गट एकत्र आले होते. आज पुन्हा कर्नाक पुलाच्या मुद्यावरून एकत्र आंदोलन करताना पाहायला मिळत आहे.

कर्नाक पुलाचे अजूनही काम सुरू न झाल्याने मनसैनिक आणि शिवसैनिकांनी आक्रमक पवित्रा घेतला आहे. मुंबईच्या मशीद बंदर रेल्वे स्थानकापासून अगदी काही अंतरवर असलेला आणि डि'मेलो मार्गाला जोडणाऱ्या कर्नाक उड्डाणपुलाचे काम पूर्ण झाल्याचा दावा मुंबई महापालिकेद्वारा केला आहे. परंतु अजूनही हा पुल सर्वसामान्यांसाठी सुरू झालेला नाही. 10 जून पर्यंत हा पूल सुरू करण्याचे मुंबई महापालिकेचे नियोजन होते. मात्र आता जुलै महिना सुरू झाला तरी देखील हा पूल वाहतुकीसाठी सुरू करण्यात आलेला नाही. त्यामुळे दोन्ही ठाकरे बंधूंची सेना एकत्र आली होती.