स्वयंघोषित ज्योतिषी भोंदू अशोक खरात प्रकरणात दररोज नवे खुलासे समोर येत असताना आता त्याच्या जवळच्या व्यक्तीकडूनच मोठा दावा करण्यात आला आहे. खरातचा स्वीय सहाय्यक (PA) रमेश हिंगे यांनी ‘साम टीव्ही’वर दिलेल्या मुलाखतीत खळबळजनक माहिती उघड केली आहे. हिंगे यांच्या म्हणण्यानुसार, अशोक खरातकडे अनेक मंत्री आणि अधिकारी भेटण्यासाठी येत असत. या भेटींमुळे खरातचा प्रभाव मोठा असल्याची चर्चा होती, असा दावा त्यांनी केला. या विधानामुळे राजकीय आणि प्रशासकीय वर्तुळात एकच खळबळ उडाली आहे.

माझा खरातच्या गैरप्रकारांशी कोणताही संबंध नाही, असा दावा त्यांनी केला. आपण केवळ कामाच्या निमित्ताने त्याच्यासोबत होतो, असेही त्यांनी सांगितले. दरम्यान, अशोक खरात प्रकरण आधीच गंभीर बनले असून विविध आरोपांमुळे तपास यंत्रणा अधिक सतर्क झाली आहे. हिंगे यांच्या या नव्या दाव्यांमुळे तपासाची दिशा आता संभाव्य राजकीय आणि प्रशासकीय संबंधांकडे वळण्याची शक्यता व्यक्त केली जात आहे. या प्रकरणात आणखी कोणते नवे धक्कादायक तपशील समोर येतात, याकडे आता सर्वांचे लक्ष लागले आहे.