मुंबईत प्रत्येकानं मराठी भाषा शिकली पाहिजे असं नाही, असं वक्तव्य केल्यानं राष्ट्रीय स्वयंसेवक संघाचे नेते भैयाजी जोशी यांच्यावर टीकेची झोड उठली आहे. यावरून विरोधकांनी सत्ताधारी महायुती सरकारला धारेवर धरले आहे. हा महाराष्ट्र आणि मराठी भाषेचा अपमान आहे, अशी टीका आदित्य ठाकरेंनी केली होती. विधानसभा अधिवेशनातही या वक्तव्याचे पडसाद उमटले. मुख्यमंत्री देवेंद्र फडणवीस यांनी विधानसभेत याबाबत उत्तर दिले.

सरकारची भूमिका पक्की आहे. मुंबई आणि महाराष्ट्राची भाषा ही मराठीच आहे. महाराष्ट्रात राहणाऱ्या प्रत्येकाने मराठी शिकलीच पाहिजे. प्रत्येकाला मराठी बोलता आली पाहिजे. भैयाजी जोशी यांचंही माझ्या वक्तव्याशी दुमत असेल असं वाटत नाही, अशा शब्दांत फडणवीसांनी उत्तर दिले.

मी पुन्हा एकदा सरकारच्या वतीने सांगतो की इतर भाषांचा इथे सन्मान आहे. कुठल्याही भाषेचा अपमान करणार नाही. स्वतःच्या भाषेवर जो प्रेम करतो, तोच दुसऱ्याच्या भाषेवरही प्रेम करतो, असेही फडणवीस यांनी निक्षून सांगितले.

देवेंद्र फडणवीस यांनी सभागृहात दिलेल्या उत्तरावर आदित्य ठाकरे यांनीही प्रतिक्रिया दिली. मी मुख्यमंत्र्यांनी मांडलेल्या भूमिकेबद्दल त्यांचे आभार मानतो, असे आदित्य ठाकरे म्हणाले.