गडचिरोली पोलिसांना आणि राज्याच्या गृह विभागाला माओवादीविरोधातील लढाईत आजवरचं सर्वात मोठं यश मिळालं आहे. माओवादी संघटनेचा पॉलिट ब्युरो आणि सेंट्रल कमिटी मेंबर मल्लोजूला वेणुगोपाल राव उर्फ भूपती यांनी आपल्या 61 सहकाऱ्यांसह गडचिरोली पोलिसांसमोर आत्मसमर्पण केलं आहे. विशेष म्हणजे, भूपती यांनी मुख्यमंत्री देवेंद्र फडणवीस यांच्या समोरच आत्मसमर्पण करण्याची अट ठेवली होती. गडचिरोलीत झालेल्या या कार्यक्रमात मुख्यमंत्री फडणवीस यांच्या उपस्थितीत भूपतींनी शस्त्रं खाली ठेवून समाजमुखी वाटचालीची नवी सुरुवात केली. पोलिस आणि प्रशासनाने या आत्मसमर्पणाचं स्वागत करत, हे राज्यातील माओवादीविरोधी मोहिमेतील ऐतिहासिक यश असल्याचं म्हटलं आहे. या घटनेनंतर गडचिरोलीत आनंदाचं वातावरण आहे.