मराठा आरक्षणाच्या मुद्द्यावर मनोज जरांगे पाटील आक्रमक झाले आहेत. अंतरवाली सराटीत उपोषणाला बसल्यानंतर प्रकृती खालावली असली तरी, जरांगे पाटील मुंबईच्या दिशेने रवाना झाले आहेत. काही मोजक्याच सहकाऱ्यांना सोबत घेऊन त्यांचा ताफा मुंबईकडे निघाला आहे. मुंबईतील आझाद मैदानात उपोषणाला बसण्यावर जरांगे ठाम आहेत. मुंबई पोलिसांकडे त्यांनी परवानगीसाठी याआधीही अर्ज केले होते. पण त्यांना परवानगी नाकारण्यात आली आहे. त्यांच्या सहकाऱ्यांनी पुन्हा परवानगीसाठी अर्ज केला आहे. जरांगेंचे मुंबईत आंदोलन आणि त्याला परवानगी देण्याबाबत मुख्यमंत्री देवेंद्र फडणवीस यांनी प्रतिक्रिया दिली आहे.

फडणवीस म्हणाले की, 'कायदा आणि सुव्यवस्था राखणं ही पोलिसांची जबाबदारी आहे. पोलीस या संदर्भातील निर्णय घेतात. जरांगेंकडून त्यांच्याकडे अर्ज आला होता. तो नाकारण्यात आला आहे. आता परवानगीसाठी त्यांनी पुन्हा अर्ज दिला आहे. मेरिटप्रमाणे पोलीस त्यावर कार्यवाही करतील.'

मुंबई, पुण्यात गणेशोत्सव मोठ्या उत्साहात साजरा केला जात आहे. या उत्सवात कुठलंही विघ्न येऊ नये अशी अपेक्षा आहे. आंदोलने होत असतात. याआधीही केली. यापुढेही ते करू शकतात. यावेळी त्यांच्या सर्व मागण्या मान्य झाल्या आहेत. ज्या मागण्या कायदेशीर होत्या, त्या मान्य करण्यात आल्या आहेत. जरांगेंनी एकूण १३ मागण्या केल्या होत्या. त्यातील १२ मान्य करण्यात आल्या आहेत. एक मागणी मान्य होऊ शकत नव्हती, त्यामागे कायद्याची काय अडचण होती, हे त्यांना समजून सांगण्यात आलं. त्याच्यामुळे कोर्टाच्या विरोधात गेलो तर मराठा समाजाचं नुकसान कसं होईल हे देखील समजून सांगितलं आहे. मला असं वाटतं अशा पद्धतीने भूमिका न घेता सणासुदीच्या दिवसात लोकांना त्रास होणार नाही असा निर्णय त्यांनी घेणे अपेक्षित आहे, असेही फडणवीस म्हणाले.