मराठा आंदोलनाचे नेते मनोज जरांगे पाटील यांनी पुन्हा एकदा राष्ट्रवादी अजित पवार गटाचे नेते तथा माजी मंत्री धनंजय मुंडे यांना लक्ष्य केले आहे. मुंडे यांनी माझा घातपात करण्यासाठी सुपारी दिली आहे. मी नार्को टेस्टसाठी तयार आहे. माझी आणि धनंजय मुंडे या दोघांची नार्को टेस्ट करा. मुंडे यांना माझ्या अंगावर गाडी घालायची आहे. त्यांनी मैदानात यावे. मी तयार आहे. असे थेट आव्हान जरांगे यांनी मुंडेंना दिले.

ते सोमवारी मुंबईमध्ये माध्यमांशी बोलत होते. धनंजय मुंडे यांना मला ठार मारायचे आहे. पोलिसांच्या ताब्यातील तीन आरोपींनी धनंजय मुंडे यांचं नाव घेतलं आहे. तरीही जालना पोलीस आणि गृहमंत्रालयाने धनंजय मुंडे यांना अटक का केली नाही किंवा चौकशीसाठी बोलावले नाही. जरांगे पुढे म्हणाले, माझ्या कोर्टात सिद्ध झालंय. धन्याने माझी 2.5 कोटींची सुपारी दिली आहे. मी पोलीस बंदोबस्त नाकारला आहे. फडणवीससुद्धा त्याला सांभाळत आहे. क्रूर माणसाला सांभाळू नका. पहिले देवेंद्र फडणवीस असे नव्हते. हे चांगलं नाही. असे वक्तव्य मनोज जरांगे पाटील यांनी केले.