गेल्या काही दिवसांपासून रायगड जिल्ह्यात पालकमंत्रीपदावरून गोगावले आणि तटकरे यांच्यात मोठ्या प्रमाणात वाद चालू आहे. हा वाद दिवसागणिक वाढताना दिसत आहे. अशातच आज पुन्हा एकदा या वादाला तोंड फुटले आहे. रायगडच्या 'थ्री इडियट्स' मधल्या एका 'इडियट्स'ने पुन्हा एकदा राष्ट्रवादी काँग्रेसचे प्रदेशाध्यक्ष खासदार सुनील तटकरे यांच्याविरुद्ध गरळ ओकली असून त्या 'इडियट्स' ची गुन्हेगारी आणि आर्थिक घोटाळे सात दिवसात बाहेर काढणार असा इशारा राष्ट्रवादी काँग्रेसचे मुख्य प्रवक्ते आनंद परांजपे यांनी शिवसेना शिंदे गटाचे मंत्री भरत गोगावले यांना दिला. यावर भरत गोगावले यांना विचारला असता ते म्हणाले, एक जरी घोटाळा आनंद परांजपे यांनी बाहेर काढून दाखवला तर मी आमदारकी सहित मंत्रिपदाचा राजीनामा देईल असा पलटवार भरत गोगावले यांनी आनंद परांजपे यांच्यावर केला. यामुळे महायुतीचा वाद पुन्हा एकदा चव्हाट्यावर आला आहे.