भोंदूबाबा अशोक खरात प्रकरणानंतर रुपाली चाकणकर यांनी राज्य महिला आयोगाच्या अध्यक्षपदाचा राजीनामा दिला होता. रुपाली चाकणकर यांनी राजीनामा दिल्यापासून महिला आयोगाचे अध्यक्षपद रिक्त आहे. महिला आयोगाच्या अध्यक्षपदासाठी ज्योती मेटे यांच्या नावाची सध्या जोरदार चर्चा सुरू आहे. ज्योती मेटे यांची या पदावर वर्णी लागण्याची दाट शक्यता व्यक्त केली जात आहे.

काही दिवसांपूर्वी ज्योती मेटे यांनी उपमुख्यमंत्री सुनेत्रा पवार यांची भेट देखील घेतली होती. आता ज्योती मेटे या राष्ट्रवादी काँग्रेस अजित पवार गटामध्ये पक्ष प्रवेश करणार असल्याची शक्यता आहे. ज्योती मेटे या दिवंगत राजकीय नेते विनायक मेटे यांच्या पत्नी आहेत. प्रशासकीय कामकाजामधला ज्योती मेटे यांना दांडगा अनुभव आहे. बारामती आणि राहुरी निवडणुकीनंतर लवकरच याबाबत निर्णय होणार असल्याची माहिती सूत्रांनी दिली.