नाशिकमधील कुंभमेळ्याच्या पार्श्वभूमीवर सिंहस्थ कुंभपर्व पुस्तिका प्रसिद्ध करण्यात आले होते. या पुस्तिकेवर मंत्री गिरीश महाजन यांचा पालकमंत्री म्हणून उल्लेख करण्यात आला आहे. नाशिकच्या पालकमंत्रिपदाचा तिढा अद्याप कायम असताना पुस्तिकेवर अशा प्रकारे उल्लेख आल्याने राजकीय वर्तुळात पुन्हा एकदा जोरदार चर्चा सुरू झाली आहे. या पुस्तिकेच्या मागच्या बाजूला हा उल्लेख करण्यात आला आहे.

नाशिक त्रंबकेश्वर सिंहस्थ कुंभमेळ्याच्या पार्श्वभूमीवर सिंहस्थ कुंभपर्व पुस्तिकेचे काही दिवसांपूर्वी मंत्री महाजन यांच्या हस्ते अनावरण करण्यात आले होते. पंतप्रधान नरेंद्र मोदी, मुख्यमंत्री देवेंद्र फडणवीस आणि दोन्ही उपमुख्यमंत्र्यांसह गिरीश महाजन यांचा पुस्तिकेच्या मागच्या बाजूला फोटो पाहायला मिळत आहे. या फोटोच्या खाली पालकमंत्री आणि कुंभ पर्व मंत्री गिरीश महाजन असा पुस्तिकेवर उल्लेख केल्याने पुन्हा नाशिक पालकमंत्री पदाच्या चर्चांना उधाण आले आहे.