मंत्रिपद महायुतीच्या कोट्यातून घ्यायचं आणि काम 'तुतारी'चं करायचं. एवढाच जर तुतारीचा पुळका येत असेल तर, मंत्रिपदाचा राजीनामा द्यावा आणि खुशाल तुतारीचं काम करावं, असा हल्लाबोल शिवसेना आमदार सुहास कांदे यांनी छगन भुजबळ यांच्यावर केलाय. ते नाशिकच्या नांदगावच्या मेळाव्यात बोलत होते.

कांदे यांच्या आरोपांवर छगन भुजबळ यांनी प्रतिक्रिया दिली आहे. आमचे लोक प्रामाणिकपणे भारती पवार यांचा प्रचार करत आहेत. जिथं एखाद्या आमदाराशी पटत नसेल तर तिथं आपण वेगळ्या प्रकारे महायुतीचाच प्रचार करायचा. वेगळं ऑफिस, फ्लेक्स, यंत्रणा असेल ती आपण उभी करायची, असं म्हणत उत्तर द्यायची इच्छा नाही, असे भुजबळ म्हणाले.

दुसरीकडे, सुहास कांदे यांनी याबाबत पुरावेच दाखवले आहेत. छगन भुजबळ अजितदादांसोबत आहेत, तर त्यांच्या लेटरहेडवर अजित पवार यांचा फोटो का नाही, असा प्रश्न कांदे यांनी उपस्थित केला आहे. लेटरहेडवर भुजबळ यांच्यासोबत शरद पवार यांचा फोटो आहे, याचा पुरावाच कांदे यांनी दाखवला आहे. याशिवाय काही फोटोही कांदे यांनी माध्यमांच्या कॅमेऱ्यासमोर दाखवले.