ठाकरे गटाचे आमदार भास्कर जाधव यांनी त्यांच्याच जवळच्या सहकाऱ्याची पक्षातून हकालपट्टी केली आहे. शिवसेना ठाकरे गटाचे चिपळूण तालुका उपप्रमुख जितेंद्र चव्हाण यांनी उद्योगमंत्री शिंदे गटाचे नेते उदय सामंत यांची भेट घेतली. ही भेट ठाकरे गटाचे आमदार भास्कर जाधव यांच्या चांगलीच जिव्हारी लागली असून त्यांनी जितेंद्र चव्हाण यांची पक्षातून थेट हकालपट्टी केली.

आगामी निवडणुकांच्या पार्श्वभूमीवर कोकणातील राजकारणात हा जाधव यांच्यासाठी मोठा धक्का मानला जात आहे. चव्हाण यांनी शिंदे सेनेचे नेते आणि उद्योगमंत्री उदय सामंत यांची भेट घेतल्याने त्यांच्यावर पक्षविरोधी कारवाईचा ठपका ठेवून ही हकालपट्टी करण्यात आली. रामपूर जिल्हा परिषद गटातून उमेदवारी न मिळाल्याने जितेंद्र चव्हाण नाराज होते आणि त्यानंतर त्यांनी सामंत यांची भेट घेतली होती, ज्यामुळे त्यांच्यावर ही कारवाई करण्यात आली.