अजय सोनवणे, साम टीव्ही

नाशिक जिल्ह्यातील निफाड तालुक्यात सोमवारी संध्याकाळी विंचूर, मरळगोई, गोंदेगाव परिसरात वादळी वारा, विजांच्या कडकडाटासह जोरदार पावसाने हजेरी लावली. या अवकाळी पावसामुळे शेतशिवारात मोठ्या प्रमाणावर पाणी साचले असून, शेतीचे मोठे नुकसान झाल्याची शक्यता वर्तवली जात आहे.

पावसाचा जोर इतका होता की काही भागांत झाडे उन्मळून पडली, तर शेतकरी वर्गाला आपली पिकं वाचविण्यासाठी धावपळ करावी लागली. या नैसर्गिक आपत्तीमुळे चिंतेचे वातावरण निर्माण झाले आहे.

या संपूर्ण दृश्याचे ड्रोनच्या माध्यमातून टिपले गेलेले चित्रण प्रसिध्द छायाचित्रकार पंडित मुदगल यांनी केले आहे. त्यांच्या कॅमेऱ्यात कैद झालेले हे दृश्य सोशल मीडियावरही झपाट्याने व्हायरल होत आहे.

संबंधित अधिकाऱ्यांनी तातडीने पंचनामे करून शेतकऱ्यांना मदतीची कार्यवाही करावी, अशी मागणी स्थानिक नागरिक आणि शेतकऱ्यांकडून करण्यात येत आहे.