संदीप नागरे, हिंगोली | साम टीव्ही

विदर्भ, मराठवाड्यासह जवळपास सर्वच जिल्ह्यांत उष्णतेची लाट आली. या लाटेचा सर्वाधिक तडाखा विदर्भात आणि त्यानंतर मराठवाड्यात बसला. हिंगोलीत उष्माघातानं पहिला बळी घेतला. औंढा तालुक्यातील गोजेगाव येथील एका ४८ वर्षांच्या महिलेचा उष्माघाताने मृत्यू झाल्याची शक्यता वर्तवली जात आहे. शेतात काम करून घरी आलेल्या महिलेला उष्मघाताचा त्रास जाणवल्याने रुग्णालयात दाखल केलं; मात्र उपचाराआधीच मृत्यू झाल्याची माहिती डॉक्टरांनी दिली. अरुणा संजय सांगळे असं मृत महिलेचं नाव आहे.

शेतावरून आली अन् अस्वस्थ वाटू लागलं

ही महिला शेतावर गेली होती. शेतातील काम उरकून एका विवाह सोहळ्याला उपस्थित राहायचं असल्यानं ती घरी आली. घरी आल्यानंतर तिला अस्वस्थ वाटू लागलं. उष्माघाताचा त्रास जाणवू लागल्यानं तिला तातडीने रुग्णालयात नेण्यात आले. पण तिथं उपचाराआधीच तिचा मृत्यू झाला, अशी माहिती डॉक्टरांनी दिली. महिलेला उष्माघाताचा त्रास जाणवत होता, अशी माहिती नातेवाईकांनीही दिली.

विदर्भातील जिल्हे होरपळले

दरम्यान, विदर्भात आज प्रचंड ऊन होते. जवळपास सर्वच जिल्ह्यांमध्ये तापमान ४० अंश सेल्सियसच्या पुढे नोंदवले गेले. अकोला - 46.9 अंश सेल्सियस, अमरावती - 46.8, बुलढाणा - 43.5 , भंडारा - 44.0, ब्रह्मपुरी - 44.2, चंद्रपूर - 45.0, गडचिरोली - 44.6, गोंदिया - 44.4, नागपूर - 45.4, वर्धा - 46.4, वाशिम - 44.6, यवतमाळ - 46.0 अंश सेल्सियस इतके तापमान नोंदवले गेले.