काल रात्री संतोष देशमुख यांच्या हत्येचे फोटो समोर आले. हे फोटो पाहिल्यानंतर संपूर्ण राज्यात संतापाची लाट उसळली.

आज अधिवेशनाच्या दुसऱ्या दिवशी धनंजय मुंडे यांनी आपल्या मंत्रिपदाचा राजीनामा दिला. त्यांच्याकडे अन्न व नागरी पुरवठा खाते होते. त्यामुळे मंत्रिमंडळात एक जागा रिक्त झाली असून, हे मंत्रिपद कोणाला मिळणार याबाबत चर्चेला उधाण आले आहे.

राज्यात दुसऱ्यांदा महायुती सरकार स्थापन झाल्यानंतर काही माजी मंत्र्यांना डच्चू देण्यात आला होता. त्यामध्ये ज्येष्ठ नेते छगन भुजबळ, अनिल पाटील, संजय बनसोडे आणि प्रकाश सोळंखे यांचा समावेश होता. मात्र, मंत्रिमंडळात स्थान न मिळाल्याने छगन भुजबळ कमालीचे नाराज होते. त्यांनी ही नाराजी उघडपणे व्यक्तदेखील केली होती. भुजबळ यांनी अनेक वर्षे अन्न व नागरी पुरवठा खाते सांभाळले आहे. त्यामुळे हे खातं पुन्हा त्यांच्या ताब्यात जाण्याची शक्यता वर्तवली जात आहे. धनंजय मुंडे यांच्या राजीनाम्यानंतर रिक्त झालेल्या मंत्रिपदावर कुणाची वर्णी लागणार, याबाबत कमालीची उत्सुकता लागलेली आहे.