लेह आणि लडाख परिसर आज सकाळी भूकंपाच्या धक्क्याने हादरला. सकाळी सुमारे ६ वाजून ५ मिनिटांनी या भागात भूकंपाचे जोरदार धक्के जाणवले. भूकंपाची तीव्रता रिश्टर स्केलवर ५.५ इतकी नोंदवण्यात आली आहे. अचानक जाणवलेल्या या धक्क्यांमुळे नागरिकांमध्ये काही काळ भीतीचे वातावरण निर्माण झाले. भूकंपाचे धक्के जाणवताच अनेक नागरिक घराबाहेर पडले. काही ठिकाणी नागरिकांमध्ये घबराटीचे वातावरण पाहायला मिळाले. मात्र, सुदैवाने या भूकंपामुळे आतापर्यंत कोणतीही जीवितहानी झाल्याची माहिती समोर आलेली नाही. दरम्यान, प्रशासन आणि संबंधित यंत्रणांकडून परिस्थितीवर लक्ष ठेवण्यात येत आहे. भूकंपानंतर कोणत्याही प्रकारचे नुकसान झाले आहे का, याची माहिती घेतली जात आहे. नागरिकांनी घाबरून न जाता प्रशासनाच्या सूचनांचे पालन करण्याचे आवाहन करण्यात आले आहे.