स्टँडअप कॉमेडियन कुणाल कामरा यानं राज्याचे उपमुख्यमंत्री एकनाथ शिंदे यांच्यावर विडंबन गीत सादर केलं. त्यानंतर शिंदेंच्या शिवसेनेचे कार्यकर्ते आक्रमक झाले. ज्या ठिकाणी कुणाल कामराचा शो झाला, त्या स्टुडिओची तोडफोड केली. राज्यभरात ठिकठिकाणी शिवसैनिकांनी कामराविरोधात आंदोलन केलं. पण माफी मागणार नाही असं कामरा म्हणाला. याच कुणाल कामराला आता शिवसेनेच्या आमदारानं इशारा दिला आहे. कामराला महाराष्ट्रात पाय ठेवू द्या, त्याची मस्ती उतरवू, असा इशारा आमदार संजय गायकवाड यांनी दिला आहे.

मी माफी मागणार नाही, पण चौकशीला सहकार्य करणार असं कुणाल कामरा म्हणाला. त्यावर आता आमदार संजय गायकवाड यांनी त्याला इशारा दिला आहे. कामराला महाराष्ट्रात येऊ द्या. शिवसैनिक त्याचा माज आणि मस्ती उतरवतील. काल तो तामिळनाडूमध्ये होता. आता त्याला इकडे रस्त्यावर तर येऊ द्या. तामिळनाडूच काय, कुठेही भेटला तरी त्याची मस्ती उतरवू, असं गायकवाड म्हणाले.

कुणाल कामराच्या कृतीचं उद्धव ठाकरे आणि आदित्य ठाकरेंसह संजय राऊत यांनी समर्थन केलं. त्यावरही गायकवाड यांनी प्रतिक्रिया दिली. कुणाल कामरा हा त्यांचाच प्यादा आहे. ते जसे सांगतात, तेच तो बोलतो. जे आदित्य, संजय राऊत सांगतात, ते कामरा करतो, असा आरोपही गायकवाड यांनी केला.