कोल्हापूर जिल्ह्यातल्या राधानगरी तालुक्यात पावसाचा जोर वाढत चालला आहे. या मुसळधार पावसामुळे मौजे चौके गावातील छोटा पूल पूर्णतः वाहून गेला असून गावाचा मुख्य रस्त्याशी संपर्क तुटला आहे.

या पुलाच्या माध्यमातून मौजे चौके गावाचा इतर भागांशी संपर्क होता. मात्र, पूल वाहून गेल्यामुळे सध्या गावात ये-जा करण्यासाठी वाहनांची वाहतूक पूर्णतः ठप्प झाली आहे.

सध्या नागरिकांना मौजे चौके येथील लोखंडी पूल वापरण्याची मुभा आहे. हा पूल केवळ पायी चालण्यासाठीच उपलब्ध असून, वाहनांची वाहतूक यावरून करू नये असे आवाहन प्रशासनाकडून करण्यात आले आहे. प्रशासनाकडून लोखंडी पूल सध्या सुस्थितीत असल्याची माहिती देण्यात आली आहे.

या परिस्थितीमुळे स्थानिक नागरिकांची मोठी गैरसोय होत असून, प्रशासनाकडून तातडीने पर्यायी व्यवस्था करण्यात यावी, अशी मागणी करण्यात येत आहे.