पालकमंत्री हसन मुश्रीफ प्रचारासाठी कागल तालुक्यातील एकोंडी गावात आलेले असताना शेतकऱ्यांनी अचानकपणे त्यांचा ताफा अडवून रस्त्यावरच ठिय्या मारल्याने गोंधळ उडाला. शक्तीपीठ महामार्गप्रश्नी आक्रमक होऊन हा ताफा अडवण्यात आला आहे. यामुळे मुश्रीफ यांना वाहनातून उतरून संबंधीत शेतकऱ्यांशी चर्चा करावी लागली.

शक्तीपीठ महामार्गप्रश्नी कागल तालुक्यातील शेतकऱ्यांनी मंत्री मुश्रीफ यांचा ताफा अडवला, रस्त्यावर ठिय्या मारत आचारसंहितेपूर्वी शक्तीपीठ महामार्ग रद्दचा निर्णय का घेतला नाही ? असा प्रश्न यावेळी शेतकऱ्यांनी विचारला आहे. शक्तिपीठ महामार्ग विरोधात गेल्या आठ महिन्यांपासून शेतकरी विविध मार्गाने आंदोलन करीत आहेत. पण सरकारकडून महामार्ग रद्दचा निर्णय झाला नाही. नेते केवळ तोंडी आश्वासने देवून बाधित शेतकऱ्यांची बोळवण करीत राहिले. आचारसंहिता लागण्यापूर्वीच शक्तीपीठ महामार्ग रद्द केल्याची लेखी अधिसूचना काढावी अशी मागणी शक्तीपीठ महामार्ग विरोधी संघर्ष समितीने केली होती. पण सरकारने याकडे दूर्लक्ष केले. बाधीत शेतकऱ्यांत प्रचंड असंतोष निर्माण झाला आहे. त्यामुळे एकोंडी गावातील शेतकऱ्यांनी मुश्रीफ यांच्या वाहनांचा ताफा अडवून नाराजी व्यक्त केली.