कर्नाटकातील विजयपूर जिल्ह्यातील मंगोली भागात असलेल्या कॅनरा बँकेच्या शाखेत मे महिन्याच्या शेवटच्या आठवड्यात भीषण दरोडा पडला. या दरोड्यात चोरट्यांनी तब्बल 59 किलो सोनं आणि मोठ्या प्रमाणात रोकड लंपास केली असून, ही देशातील आतापर्यंतची सर्वात मोठी सोन्याची चोरी असल्याचे मानले जात आहे.

दरोडेखोरांनी बँकेत घुसून सीसीटीव्ही यंत्रणा बंद केली, आणि संपूर्ण चोरी अत्यंत पूर्वनियोजित पद्धतीने केली. विशेष म्हणजे चोरी झाल्यानंतर चोरांनी काळ्याजादूचे साहित्य बँकेत ठेवले असून, त्यामुळे परिसरात भीतीचं वातावरण पसरलं आहे.

पोलिसांना मिळालेल्या प्राथमिक माहितीनुसार, या दरोड्यात 6 ते 8 जणांचा सहभाग असण्याची शक्यता वर्तवली जात आहे. या गुन्ह्यात बँकेतीलच कुणी कर्मचारी सहभागी होता का? याचाही पोलिसांकडून तपास सुरू आहे.

दरम्यान, या प्रकरणी पोलिसांनी अद्याप कोणालाही अटक केलेली नाही, तसेच चोरांनी सोने नेमकं कसं पळवलं, हे देखील स्पष्ट झालेलं नाही. त्यामुळे संपूर्ण राज्यात तसेच देशभरात या घटनेमुळे खळबळ उडाली आहे.