कारगिल युद्धात लढलेल्या पुणे येथील एका माजी सैनिकाच्या घरात मध्यरात्री घुसून गोंधळ घालून आक्षेपार्ह शब्दांचा वापर करीत कुटुंबीयांवर दबाव निर्माण केला,अशी तक्रार माजी सैनिकाच्या भावाने चंदननगर पोलिस ठाण्यात केली आहे. ही घटना शुक्रवारी मध्यरात्री खराडीतील चंदननगर येथे घडली. याबाबत शमशाद अली शेख यांनी तक्रार दिली आहे. मात्र अजूनही पोलिसांनी गुन्हा दाखल करून घेतला नाही. याच शेख कुटुंबातील तक्रारदारांच्या आजोबा व चुलते भारतीय सैन्य दलामध्ये आपली सेवा बजावत निवृत्त झाले आहेत.

ते युद्धामध्ये सहभागी झाल्याचं शेख कुटुंबीय सांगत आहे. कुटुंबीयांनी दिलेल्या माहितीनुसार एका टोळक्याने रात्री बारा वाजता घरात घुसून गोंधळ घालून,तुम्ही रोहिंग्या बांगलादेशी आहात,अशा आक्षेपार्ह शब्दांचा वापर केला. तुम्ही इथून निघून जा, असा दबाव कुटुंबीयांवर आणला. घरातील एकाला झोपेतून उठून आधार कार्ड मागितले आणि शिवीगाळ केली असल्याचा आरोप शेख कुटुंबियांनी केला आहे. शेख कुटुंबीय गेले 50 वर्षापेक्षा जास्त काळ पुण्यात राहत असल्याचे पुरावे त्याच्याकडे आहेत. याबाबत चंदन नगर पोलीस स्टेशन मध्ये तक्रार दाखल असून अद्याप गुन्हा दाखल नाही. या घटनेचा अधिक तपास पोलीस करत आहेत.