भारतातील प्रसिद्ध विनोदवीर कपिल शर्मा याच्या कॅनडामधील ‘Kap’s Cafe' रेस्टॉरंटवर गोळीबार झाल्याची धक्कादायक घटना घडली आहे. ब्रिटिश कोलंबिया प्रांतातील सरे (Surrey) शहरात रात्री उशिरा ही घटना घडली असून, अज्ञात व्यक्तींनी कॅफेमध्ये जवळपास ८ ते ९ गोळ्या झाडल्या असल्याची माहिती स्थानिक पोलिसांनी दिली आहे.सुदैवाने या घटनेत कोणतीही जीवितहानी झाली नसून, कॅफेमध्ये उपस्थित सर्वजण सुखरूप आहेत. पोलिसांनी घटनास्थळी तातडीने पोहोचून परिसर बंद केला असून, तपास सुरू करण्यात आला आहे.

या हल्ल्याची जबाबदारी बब्बर खालसा इंटरनॅशनल (BKI) या खलिस्तानी संघटनेशी संबंधित दहशतवादी हरजीत सिंह लड्डी याने सोशल मीडियावर केलेल्या पोस्टद्वारे घेतल्याचा दावा करण्यात येत आहे. कपिल शर्माने दिलेल्या कथित वक्तव्यामुळेच हल्ला केल्याचा आरोप त्याने केला आहे. स्थानिक पोलिसांकडून या संपूर्ण प्रकरणाचा तपास गतीने सुरू असून, हल्लेखोरांचा शोध घेण्यात येत आहे.