कल्याण येथील कोळसेवाडी आणि विजयनगर परिसरात मध्यरात्री मद्यधुंद टवाळखोरांनी दहशत माजवली. या उपद्रवींनी 7 ते 8 गाड्यांवर दगडफेक करत गाड्यांची तोडफोड केली. या घटनांमुळे परिसरातील नागरिक भयभीत झाले असून मोठ्या प्रमाणावर वाहनांचे नुकसान झाले आहे.

ही घटना घडली त्यावेळी अनेक नागरिक झोपेत असतानाच अचानक गाड्यांच्या काचा फुटण्याचा आवाज आला. काही नागरिकांनी बाहेर येऊन पाहिलं असता टोळकी दगडफेक करत गाड्यांवर तुफान हाणामारी करत असल्याचं निदर्शनास आलं.

घटनेनंतर कोळसेवाडी पोलीस घटनास्थळी दाखल झाले असून सध्या गुन्हा दाखल करण्याची प्रक्रिया सुरू आहे. पोलिसांकडून परिसरातील सीसीटीव्ही फुटेज तपासले जात असून दोषींवर कडक कारवाई केली जाईल, असं पोलिसांनी स्पष्ट केलं आहे.

सदर प्रकारामुळे स्थानिक नागरिकांमध्ये भीतीचे आणि असुरक्षिततेचे वातावरण निर्माण झाले असून पोलीस प्रशासनाकडून वाढीव गस्त ठेवण्याची मागणी केली जात आहे.