काही दिवसांपूर्वी घाटकोपर येथे होर्डिंग कोसळून मोठी दुर्घटना घडली होती. याच घटनेची पुनरावृत्ती कल्याणमध्ये होता होता टळली. कल्याणच्या सहजाणंद चौकात शुक्रवारी सकाळच्या सुमारास भलंमोठं होर्डिंग कोसळलं. यामध्ये अनेक वाहने होर्डिंगखाली अटकली. सुदैवाने या घटनेत कोणतीही जीवितहानी झाली नाही. मात्र, होर्डिंगखाली दबल्याने २ जण जखमी झाले.

जखमींना तातडीने उपचारासाठी रुग्णालयात दाखल करण्यात आले. अंगाचा थरकाप उडवणाऱ्या या घटनेचा सीसीटीव्ही फुटेज समोर आला आहे. या घटनेत वाहनांचे मोठे नुकसान झालं आहे. घटनेची माहिती मिळताच अग्निशामक दलाची टीम घटनास्थळी दाखल झाली असून बचाव कार्य सुरु आहे.

गेल्या काही दिवसांपासून मुंबई शहरात होर्डिंगचा प्रश्न ऐरणीवर आला होता. पण पुन्हा तशीच घटना कल्याणमध्ये घडल्यामुळे नागरिकांमध्ये भीतीचं वातावरण निर्माण झालं आहे. सकाळच्या वेळी मोठ्या प्रमाणात वर्दळ असलेल्या सहजानंद चौकात होर्डिंग कोसळल्यामुळे लोकांचे हाल झाले आहे.