शाळांमध्ये विद्यार्थ्यांच्या सुरक्षिततेसाठी कल्याण-डोंबिवली महानगरपालिकेकडून विविध उपाय योजना राबवल्या जात आहेत. शाळांमध्ये सीसीटीव्ही कॅमेरे बसवण्यात आले असून त्या पाठोपाठ शाळांमध्ये अचानक आग लागण्यासारखी दुर्घटना घडल्यास सुरक्षिततेसाठी विद्यार्थ्यांना अग्नि सुरक्षेचे धडे कल्याण डोंबिवली महापालिकेच्या अग्निशमन विभागामार्फत विद्यार्थ्यांना दिले जात आहे. आग लागल्यास कसा बचाव करावा? कोणत्या उपाययोजना कराव्यात? याबाबत कल्याण अग्निशामन दलाच्या वतीने कल्याण पश्चिमेतील शाळेत विद्यार्थ्यांना अग्निसुरक्षा प्रशिक्षण देण्यात आले.

यावेळी फायर इन्स्ट्रुमेंट म्हणजेच (Fire Extinguisher) चा वापर कसा करावा घाबरून न जाता कोणत्या उपाययोजना कराव्यात? कोणत्या परिस्थितीत कोणते यंत्र उपयोगात आणावे? याची सविस्तर माहिती विद्यार्थ्यांना देण्यात आली.अग्निशामक दलाच्या अधिकाऱ्यांनी विद्यार्थ्यांना धूर भरलेल्या ठिकाणी कसा मार्ग काढायचा, आगीपासून स्वतःचा व इतरांचा जीव कसा वाचवायचा, तसेच प्राथमिक अग्निशमन यंत्रणांचा वापर कसा करायचा यावर प्रत्यक्ष प्रात्यक्षिकांद्वारे माहिती दिली.