बीड सरपंच संतोष देशमुख हत्याकांडमधील खंडणी प्रकरणातील आरोपी वाल्मिक कराड हा सध्या कोठडीत आहे. त्याची चौकशी सुरू आहे. मात्र असं असतानाही कराड याच्या दिमतीत ७ पोलीस ठेवण्यात आले आहे. बीडमधील कराडच्या गॅंगमधले छोटे मोठे गुन्हेगार हे मुद्दाम स्वत:वर एखादा गुन्हा ओढवून घेत जेलमध्ये पोहोचत आहे. त्यानंतर रात्री जेलमध्ये मैफिल रंगते, असा आरोप जितेंद्र आव्हाड यांनी केला आहे.

बीडच्या मस्साजोगचे माजी सरपंच संतोष देशमुख यांच्या हत्येत खंडणी प्रकरणातील आरोपी वाल्मिक कराड हा मास्टर माईंड असल्याचा संशय असल्याने त्याला पोलिसांनी तब्यात घेतलं आहे. गेल्या काही दिवसांपासून तो कोठडीत असून त्याच्यावर मकोका देखील लावण्यात आलेला आहे. या संपूर्ण प्रकरणाचा तपास सीआयडी आणि एसआयटीकडून करण्यात येत आहे. पण आता वाल्मिक कराडच्या या जेल वारीवर जितेंद्र आव्हाड यांनी गंभीर आरोप केलेले आहेत. त्याबद्दल त्यांनी एक ट्विट केलेलं आहे. या ट्विटमध्ये आव्हाड यांनी म्हटलं आहे की, हॉस्पिटलमधून बाहेर काढलेल्या वाल्मिक कराड याला आता बीड जेलमध्ये ठेवलं आहे. जेलमध्ये त्याच्या दिमतीत ७ हवालदार तैनात ठेवण्यात आलेले आहेत. बीडमधील त्याच्या गँगमधील छोटे-मोठे गुन्हेगार मुद्दामहून स्वतःवर एखादा गुन्हा ओढावून घेतात. अन् या गुन्हेगारांची रवानगी बीडपोलिसात होते. मग ते आपोआप वाल्मिक कराडच्या जवळ पोहोचतात आणि मग रात्री मस्त मैफिल रंगत असते. एकंदरीत तो कारागृहात आहे, अशी भावनाच त्याच्या मनात निर्माण होऊ द्यायची नाही, असा निर्णय शासन दरबारी झालेला दिसत आहे, असं आव्हाड यांनी ट्विटमध्ये लिहिलेलं आहे.