राज्याचे अर्थसंकल्पीय अधिवेशन सुरू असून शुक्रवारी गृहराज्यमंत्री पंकज भोईर यांच्याकडून विधानसभेत धर्म स्वातंत्र्य विधेयक मांडण्यात आले. या विधेयकाला शिवसेना ठाकरे गटाचे प्रमुख उद्धव ठाकरे यांनी देखील पाठिंबा दिला असून भास्कर जाधव यांनी याबाबत सभागृहात भूमिका मांडली. या विधेयकावर चर्चा सुरू असताना शरद पवार गटाचे आमदार जितेंद्र आव्हाड यांनी विरोध दर्शविला. तसेच त्यांनी छत्रपती शिवाजी महाराजांबद्दल आक्षेपार्ह वक्तव्य केल्याचा आरोप शिवसेना आणि भाजप नेत्यांनी केला. त्यानंतर सत्ताधारी गट चांगलाच आक्रमक झाला. मंत्री दादा भुसे यांनी आव्हाड यांच्यावर जोरदार टीकास्त्र सोडले. तसेच त्यांच्या निलंबनाची मागणी केली. यावेळी मंत्री नितेश राणे हे देखील चांगलेच भडकल्याचे पाहायला मिळाले. जितेंद्र आव्हाड यांचे तात्काळ निलंबन करा अशी मागणी त्यांनी विधानसभा अध्यक्ष राहुल नार्वेकर यांच्याकडे केली. त्यानंतर आव्हाड यांनी सभागृहात दिलगिरी व्यक्त केली.