India stops buying oil from Russia : अमेरिकेचे राष्ट्राध्यक्ष डोनाल्ड ट्रम्प यांच्या शुल्क धोरणाचा परिणाम भारताच्या ऊर्जा धोरणावर दिसून येत आहे. गेल्या आठवड्यापासून भारतातील सरकारी रिफायनरी कंपन्यांनी रशियाकडून कच्च्या तेलाची खरेदी थांबवली आहे. यामागे दोन प्रमुख कारणे सांगितली जात आहेत.

रशियाकडून मिळणाऱ्या सवलतीत कपात आणि ट्रम्प यांची धमकी. १४ जुलै रोजी ट्रम्प यांनी रशियाकडून तेल आयात करणाऱ्या देशांवर १०० टक्के शुल्क लादण्याचा इशारा दिला होता. परिणामी, भारतातील चारही सरकारी कंपन्यांनी गेल्या आठवड्यात रशियाकडून नवीन खरेदी केली नाही. यामुळे भारताच्या ऊर्जा पुरवठ्यावर आणि आर्थिक धोरणावर परिणाम होण्याची शक्यता आहे. रशियाकडून स्वस्त तेल आयात करणारा भारत आता पर्यायी मार्ग शोधत आहे, ज्यामुळे जागतिक बाजारपेठेतही तेलाच्या किमतीवर परिणाम होऊ शकतो.