पुणे जिल्ह्यातील डिंभे धरण आणि माळीण परिसरात शनिवारी मुसळधार पावसाने जोर धरला आहे. सतत सुरू असलेल्या पावसामुळे माळीणकडे जाणारा मुख्य मार्ग पाण्याखाली गेला असून वाहतूक पूर्णतः बंद करण्यात आली आहे.

या पावसामुळे माळीण परिसरातील तब्बल ११ गावांचा संपर्क तुटला आहे. डिंभे धरणाच्या खाली नव्याने सुरू असलेल्या पुलाचे काम अद्याप पूर्ण न झाल्याने, त्या ठिकाणी तात्पुरता पर्यायी मार्ग तयार करण्यात आला होता. मात्र, पावसामुळे हा पर्यायी मार्गही पाण्याखाली गेला असून माळीणकडे जाणाऱ्या वाहनांची व नागरिकांची हालचाल पूर्णतः ठप्प झाली आहे.

प्रशासनाने नागरिकांना आवाहन केले आहे की, कृपया धोकादायक पाण्यांतून प्रवास करू नये. पावसाचा जोर लक्षात घेता स्थानिक प्रशासन सतर्क असून मदत आणि बचाव पथकांनी तयारी सुरू केली आहे.