नाशिकमध्ये उन्हाचा तडाखा वाढत असून, रविवारी हंगामातील सर्वात जास्त तापमानाची नोंद झाली. रविवारी दुपारी नाशिकचे तापमान तब्बल ३९.२ अंश सेल्सिअसवर पोहोचले. वाढत्या तापमानासोबत ढगाळ हवामानामुळे उष्णतेची तीव्रता अधिक जाणवत आहे.

हवामान विभागाने नाशिकसह परिसरासाठी पुढील तीन दिवस यलो अलर्ट जारी केला आहे. यामध्ये नाशिक जिल्ह्यासह घाटमाथ्यावर गडगडाटासह विजांचा कडकडाट होण्याची शक्यता वर्तवण्यात आली आहे. तसेच, काही ठिकाणी गारपीट होण्याचाही अंदाज आहे.

नागरिकांनी आवश्यक ती काळजी घेण्याचे आवाहन प्रशासनाने केले असून, गरजेच्या कामाशिवाय उन्हात जास्त वेळ बाहेर पडू नये, तसेच पाणी आणि थंड पेय पदार्थांचा अधिकाधिक वापर करावा, असेही सांगण्यात आले आहे.