मोदी सरकारने सर्वसामान्यांना दिलासा देण्यासाठी जाहीर केलेल्या जीएसटी कपातीवर आता गोंधळ निर्माण झाला आहे. सुरुवातीला या कपातीचा लाभ ग्राहकांना सोमवारपासून मिळणार असल्याचं सांगण्यात आले होते. मात्र केंद्रीय ग्राहक व्यवहार,अन्न आणि सार्वजनिक वितरण मंत्रालयाच्या परिपत्रकानुसार ग्राहकांना जीएसटी कपातीचा लाभ एप्रिलपासून मिळण्याची शक्यता आहे. विक्रेत्यांना मार्च अखेरपर्यंत जुन्या दरानेच वस्तू विक्री करण्याची मुभा देण्यात आली आहे. त्यामुळे ग्राहकांची अपेक्षा भंग झाली असून मुंबई ग्राहक पंचायतीनं या निर्णयावर तीव्र आक्षेप घेतला आहे. सर्वसामान्यांना त्वरित लाभ न देणं अन्यायकारक असल्याचं मत व्यक्त होत असून सरकारने हा निर्णय पुनर्विचार करण्याची मागणी जोर धरत आहे.