नांदेड येथील धर्माबाद शहरात मतदानाच्या दिवशी मोठा गोंधळ उडाल्याची घटना घडली. एका मतदान केंद्रावर एका महिलेला बोगस मतदान करताना स्थानिक महिलांनी रंगेहाथ पकडल्याने परिसरात तणाव निर्माण झाला.

तेलंगणा राज्यातील मतदारांना धर्माबादमध्ये आणून बोगस मतदान केल्याचा गंभीर आरोप करण्यात येत आहे. मतदान केंद्रावर संशयास्पद हालचाली दिसून आल्यानंतर काही महिलांनी संबंधित महिलेला अडवले. यावेळी ती बोगस मतदान करत असल्याचा आरोप करत स्थानिक महिला उमेदवार आणि त्यांच्या समर्थकांनी तिला जाब विचारला. या प्रकारानंतर परिस्थिती चिघळली असून बोगस मतदान करणाऱ्या महिलेला स्थानिक महिला उमेदवारांकडून चोप दिला. घटनेनंतर मतदान केंद्र परिसरात बोगस मतदारांची एकच पळापळ झाल्याचे दिसून आले.