इथिओपियातील हायली गुब्बी परिसरात झालेला ज्वालामुखी उद्रेक सध्या जागतिक स्तरावर चर्चेचा विषय ठरला आहे. या उद्रेकानंतर इथिओपियाबरोबरच ओमान आणि येमेन येथील हवामानावरही त्याचे मोठे परिणाम दिसून आले आहेत. ज्वालामुखीतून बाहेर पडलेली राख, सल्फर डाय ऑक्साईड आणि सूक्ष्म काचेचे तुकडे यांच्या प्रचंड प्रमाणातील ढगांची निर्मिती झाली असून हे ढग शेकडो किलोमीटरपर्यंत पसरू लागले आहेत. इथिओपियातून निघालेले हे ढग येमेनमार्गे गुजरातपर्यंत पोहोचले असून संध्याकाळपर्यंत ते चीनच्या दिशेने सरकतील अशी माहिती समोर आली आहे. या बदललेल्या वातावरणामुळे विमान वाहतुकीवर विशेषतः मोठा परिणाम होत आहे.

इथिओपियात नेमकं घडलं काय?

रविवारी इथिओपियाच्या पूर्वेकडील भागात अचानक ज्वालामुखीचा उद्रेक झाला. तब्बल १० हजार वर्षांनंतर हा ज्वालामुखी सक्रिय झाल्याचे सांगितले जाते. उद्रेकाची तीव्रता एवढी मोठी होती की राख आणि खडीचे लोळ १४ ते १५ किलोमीटर उंच आकाशात उडाले. सध्या उद्रेकाचं प्रमाण कमी होत असलं तरी लाव्ह्यासोबत वर गेलेल्या राखेच्या ढगांचा आंतरराष्ट्रीय परिणाम स्पष्टपणे जाणवू लागला आहे.