मुंबईतील वाहतूक व्यवस्थेचा अत्यंत महत्त्वाचा मानला जाणारा ब्रिटिशकालीन एल्फिन्स्टन पूल पाडण्याचे काम सध्या रखडणार आहे. पश्चिम रेल्वेने या कामासाठी परवानगी देताना तब्बल 59 कोटी रुपयांची मागणी केली आहे. मात्र ‘महारेल’ ने ही रक्कम अवाजवी असल्याचं सांगत ती देण्यास नकार दिला आहे. त्यामुळे पुलाच्या पाडकामाला आवश्यक रेल्वे ब्लॉक मिळालेला नाही. ‘गतिशक्ती’ आराखड्यानुसार हा प्रकल्प महसूलविना असल्याने जास्त शुल्क आकारणे योग्य नसल्याचं ‘महारेल’चं मत आहे. या वादामुळे पुलाचं काम अडकलं असून नागरिक आणि वाहनधारकांना मोठा फटका बसणार आहे. तसेच वाहतूक कोंडी आणखी वाढण्याची शक्यता व्यक्त केली जात आहे.