आगामी काळात राज्यात महापालिका निवडणुका होऊ घातल्या आहेत. त्यादृष्टीनं सर्वच प्रमुख पक्षांनी जोरदार तयारी केली आहे. मुंबई महापालिका निवडणुकीच्या पार्श्वभूमीवर एकनाथ शिंदेंच्या शिवसेनेनं पूर्वतयारी म्हणून मिशन मुंबई बैठक घेतली जाणार आहे. वरळीत शिवसेनेच्या मुंबईतील पदाधिकाऱ्यांची ही बैठक असणार आहे. एकनाथ शिंदे, खासदार श्रीकांत शिंदे आणि पदाधिकारी उपस्थित राहतील. एकनाथ शिंदे हे निवडणुकीच्या पार्श्वभूमीवर पदाधिकाऱ्यांना मार्गदर्शन करणार आहेत. महापालिकेच्या दृष्टीने या बैठकीला महत्व प्राप्त झालं आहे.

आशियातील सर्वात श्रीमंत असलेल्या मुंबई महापालिकेची निवडणूक आगामी काळात होणार आहे. मुंबई महापालिका जिंकण्यासाठी सर्वच पक्षांनी आधीपासूनच फिल्डिंग लावली आहे. सर्वच राजकीय पक्षांनी मोट बांधायला सुरुवात केली आहे. पण २०१९ पासून राजकीय समीकरणं बदलली आहेत. राज्यात महाविकास आघाडी झाली. त्यानंतर एकसंध शिवसेना फुटून दोन गट पडले. राष्ट्रवादी काँग्रेसही फुटली आणि दोन गट पडले. सध्या भाजप, शिवसेना शिंदे गट आणि राष्ट्रवादी काँग्रेस अजित पवार गट अशी महायुती राज्यात सत्तेत आहे. आता राज्यात महापालिका निवडणुका होणार असल्याने आघाडी किंवा युती असली तरी, प्रत्येक पक्षाने स्वतंत्रपणे चाचपणी करण्यास सुरुवात केली आहे. काही प्रमुख पक्षांच्या नेत्यांनी तर स्वबळावर लढण्याचा नारा दिला आहे. तशी तयारी देखील केल्याचं समजतं. आता शिंदेंच्या शिवसेनेकडूनही मिशन मुंबई हाती घेण्यात आली आहे. त्यानुसार मुंबईत बैठक होत आहे. स्वतः एकनाथ शिंदे उपस्थित राहणार असून, ते पदाधिकाऱ्यांना मार्गदर्शन करणार आहेत.